जालना/जालना कव्हरेज न्यूज: जालना शहरातील नूतन वसाहत परिसरात शनिवारी दुपारी घडलेली एक धक्कादायक घटना समोर आली आहे, ज्याने संपूर्ण शहरात खळबळ उडवून दिली. दारूच्या नशेत आणि पैशांवरील किरकोळ वादातून मित्रानेच मित्रावर चाकूने जीवघेणा हल्ला केला. या हल्ल्यात शौकत शेख (वय ३५) हा तरुण गंभीर जखमी झाला असून, त्याच्या डोक्यात चाकू अडकलेल्या अवस्थेत त्याने स्वतःच जिल्हा सामान्य रुग्णालय गाठले. हे दृश्य पाहून रुग्णालयातील डॉक्टर आणि कर्मचारीही हादरून गेले.
Manoj Jarange Patil: मनोज जरांगे पाटील यांचा लिफ्टमधील थरार, बीडच्या रुग्णालयातील धक्कादायक अपघात!
प्राथमिक माहितीनुसार, शौकत शेख आणि त्याचा मित्र पांडुरंग थोरात हे दोघे शनिवारी दुपारी एकत्र बसून दारू पित होते. दारूसाठी पैसे देण्याच्या मुद्द्यावरून दोघांमध्ये वाद झाला. हा वाद इतका टोकाला गेला की, संतापलेल्या पांडुरंगने जवळ असलेला चाकू उचलून शौकतच्या डोक्यात खुपसला. चाकू डोक्यात खोलवर रुतला असतानाही शौकतने धैर्य दाखवत स्वतः रुग्णालयात धाव घेतली. रुग्णालयात पोहोचताच डॉक्टरांनी तातडीने शस्त्रक्रिया करून चाकू काढला. सध्या शौकतची प्रकृती स्थिर आहे, अशी माहिती डॉ. शेख साबीर यांच्या नेतृत्वाखालील वैद्यकीय पथकाने दिली.
या घटनेनंतर स्थानिक पोलीस ठाण्यात गुन्हा दाखल करण्यात आला आहे. आरोपी पांडुरंग थोरात सध्या फरार असून, त्याचा शोध घेण्यासाठी पोलिसांनी विशेष पथक तयार केले आहे. पोलीस उपनिरीक्षक रमेश पाटील यांनी सांगितले की, “आरोपीला लवकरात लवकर ताब्यात घेण्यासाठी तपास सुरू आहे. या प्रकरणात सखोल चौकशी करून कायदेशीर कारवाई केली जाईल.”
