जालना (चेतन शिंदे- जालना कव्हरेज न्यूज): जालना शहरातील यमुना रेसिडेन्सी परिसरात घडलेल्या मारहाणीच्या घटनेतील पीडित कुटुंबाला भेटण्यासाठी भाजपचे आमदार नारायण कुचे यांनी शनिवारी जालना जिल्हा सामान्य रुग्णालयात भेट दिली. यावेळी त्यांनी पीडितांच्या प्रकृतीची विचारपूस करत कुटुंबाला धीर दिला.
ही घटना यमुना रेसिडेन्सी भागात घडली, जिथे एका मुलीची छेड काढल्याच्या कारणावरून तिच्या वडिलांनी दोन तरुणांना जाब विचारला. याचा राग आल्याने त्या तरुणांनी वडिलांवर लाठ्या-काठ्यांनी हल्ला केला. या हल्ल्यात पीडित वडिलांना गंभीर दुखापत झाली, त्यामुळे त्यांना तातडीने जिल्हा शासकीय रुग्णालयात दाखल करण्यात आले. सध्या त्यांच्यावर उपचार सुरू आहेत.
आमदार नारायण कुचे यांनी रुग्णालयात पोहोचून पीडित कुटुंबाशी संवाद साधला. त्यांनी पीडितांच्या तब्येतीची माहिती घेतली आणि त्यांना सर्वतोपरी मदत करण्याचे आश्वासन दिले. यावेळी त्यांनी कुटुंबाला धीर देत, या कठीण प्रसंगात त्यांच्या पाठीशी असल्याचे सांगितले.
घरकुलासाठी वाळू मिळत नाही म्हणून लाभार्थ्यांचे स्वतःला नदीपात्रात गाडून घेत अनोखे आंदोलन
या घटनेमुळे परिसरात तणाव निर्माण झाला असून, स्थानिक पोलिसांनी या प्रकरणाचा तपास सुरू केला आहे. पोलिसांनी दोन्ही आरोपींविरुद्ध गुन्हा दाखल केला असून, पुढील कारवाई सुरू आहे. ही घटना गंभीर स्वरूपाची असल्याने पोलिसांनी तपासाला गती दिली आहे.
